Ai ia Disi Artam, Disi do Roham !”
(Mateus 6 : 19 – 24)
I. Patujolo
Holsoan ! Jotjot do hita holsoan hinorhon ni sipanganon, parabiton (sandang-papan), dohot lan na asing dope, na tagoari arta dohot sinamot di ngolunta on. Tujuan ni ngolu hombar tu falsafah ni halak Batak na mangeahi Hasangapon, Hagabeon, dohot Hamoraon, asa songon na singkop tahilala molo dung jumpang i ngolunta on.
Molo ndang adong di hita Hasangapon, Hagabeon, dohot Hamoraon i, gabe olo mandate, mandele, jala mura marungutungut, jotjot holsoan hita. Hape taingot do pandohan ni Tuhanta Jesus na mandok, “Sai jumolo ma lului hamu Harajaon ni Debata dohot Hatigoran-Na, dung i tambahononna do sude angka ondeng tu hamuna” (Mat. 6: 33). Antong, boasa jotjot holsoan hita dingolunta on ?
II. Hatorangan
Ai diida Tuhan Jesus do parngoluon ni angka sisean-Na nang angka na torop na mangihuthon Ibana; na deba denggan parngoluonna, jala na deba mangolu di bagasan hapogoson. Hinorhon ni I, sian na dua horong i, tongtong tujuan ni ngoluna laho manambai hamoraonna dohot mangalului arta, sinamot dope di ngoluna.
Baik halak naung mamora dohot na pogos i, marlumbalumba laho papunguhon arta, sinamotna di tano on. Songon pandohan ni Parjamita (Hbr: Qohelet), na laho salpu do sudena jala pangeahion di alogo sambing do i, tung so marguna do hamoraon i molo na i gabe hatuan di ngolu ni jolma i.
I do umbahen didok Tuhan Jesus, “Unang papungupungu hamu arta di hamu di tano on, di na targagat tasik dohot ngitngit, di na tarhali jala tartangko panangko i!” (ay.19). Alai adong do arta, sinamot (hamoraon) na so targagat tasik manang ngitngit, di na so tarhali jala so tartangko panangko i ! (ay.20). Ima arta di Banua Ginjang. Lapatanna, asa angka na di Ginjang i ma taparrohaon, unang ma angka na di tano on.
Dia ma ulaon na naeng siulahononta asa adong pungu artanta di Banua Ginjang ? On do, taulahon ma ulaon holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon (pat. Gal.5: 22). Alai tatadingkon, tatanggalhon ma parulaon hisaphisap ni dagingta, ima ulaon parmainanon, hahodaron, pargadombuson, hasipelebeguon, parmusuon, parsalisian, parmabuhon, dna (pat. Gal.5: 19-21; Kol.3: 8-9).
Ai ia disi artam, disi do roham ! Tutu do pandohan ni Tuhanta on. Godang do halak ndang boi sonang modom holan ala mamingkiri sude arta, sinamot (hamoraonna). “Songon dia do ulaning mobil na baru hutuhor i, aman do i di garasi ? Ai 1 M argana fuang, jala holan ahu dope nampuna mobil songon i.” Ala ndang tenang roha dohot pingkiran nampunasa mobil baru i, asa pos rohana gabe modom dibagasan mobilna i do ibana. Jala godang angka tudosan na boi tabuat sian angka pengalamanta masing-masing na ingkon taparhatutu do pandohan on: Ai ia disi artam, disi do roham !
Ruas ni pamatangta na berperan laho parohon hagiot, roha na manghirim, tubu panagaman, ima simalolongta (mata). Adong pe di ibana arta, sinamot alai hinorhon simalolongna gabe tubu do rasa na so olo puas, naeng ingkon godang jala martambatamba hamoraonna i. Jala di angka na so adong di ibana arta, sinamot, hinorhon simalolongna i do gabe parohon holso di bagasan rohana. “Bereng ma annong…andigan so mamora ahu, hutuhor pe I jala sada-sada di hami ganupan”.
Hinorhon simalolongta (mata) boi do patubuhon elat, teal, late dohot hosom maradophon dongan jolma. Sudena i boi mamboan jolma i tu pangunjunan, madabu tu bagasan dosa. Dari mata turun ke hati. Dari hati timbul niat jahat. Na tubu dibagasan rohanta i do na mangonjar jolma i laho mangulahon angka hajahaton laho papuashon hagiot dohot hisap-hisap ni dagingna. Molo sian pamerenganta pe nunga tubu hagiot na jahat, na roa; tontu sahali rohanta pe terpengaruh laho mangulahon na jahat, na roa. Ido umbahen didok Tuhan Jesus di ay. 23,”Ai molo roa matami, holom ma sude dagingmu. …”
Alani i, mansai porlu motto manang prinsip di ngolunta nuaeng. Dia ma jumolo talului, taeahi di ngolunta di hasiangan on. Mangoloi hagiot, hisap-hisap di roha dohot dagingta do hita ? Manang mangoloi pandohan ni Tuhan Jesus, ima na mangalului, mangeahi, mangoloi mangulahon angka nahinalomohon ni Jahowa di ngolunta on ? Ai ingkon sada do tabuat alusta. Ai ndang haoloan hita Jahowa rap dohot Mammon ! Ingkon jumolo hita mangoloi Jahowa, dungkon i, jaloonta ma angka ondeng sian Hamoraon-Na i.
III. Panimpuli
Hita jolma do hasurungan ni Jahowa sian nasa na tinompa-Na i. Gari pidong na martonga-tonga langit, angka na so manabur, na so manggotil, na so papunguhon tu sopo; tong do diparmudumudu Tuhanta ! Gari hita ma ?
Tantangan manang musu ni jolma i laho mangoloi Jahowa di pardalanan ni ngoluna di hasiangan on holan on do: olo ganggu, mabiar rohana jala losok laho mangulahon Hata ni Tuhan i di ngoluna. Ndang boi manaluhon hagiot manang hisap-hisap ni roha dohot pamatangna. Hape jotjot tahatindangkon na porsea do hita di Jahowa na tongtong manjagai, marmuduhon ngolunta sian ari naung salpu, sadari on, ro di salelenglelengna. Alai gabe jotjot taparsoada i holan alani i angka ragam hamaolon, tantangan na taadopi di ngolunta, tarlumobi ma dina hurangan hita di arta, sinamot i (hamoraon).
Roha na holsoan boi do gabe roha na ringgas, namamuji-muji huhut mandok mauliate tu Tuhan i, molo gomos tapeop jala tahangoluhon Hata ni Tuhanta Jesus na mandok, “Antong, unang ma holsohon hamu ari marsogot, ai sarihonon ni ari marsogot do na ringkot disi. Sai do, molo masiporsan hasusaanna be angka ari.” (ay.34). Dumenggan do ari marsogot molo tongtong satia hita mangalului Harajaon ni Jahowa, ima marhite na manghangoluhon na hinalomohon ni roha-Na i di nasa gulmit ni parngoluonta siganup ari.
Unang be ganggu, mabiar jala holsoan hita molo ndang adong di hita arta, sinamot di tano on ai disarihon Jahowa do ngolunta siganup ari asal ma tapasahat ngolunta mangalului Harajaon dohot Hatigoran-Na i. Alani i, papungu ma arta dohot sinamotmu di Banua Ginjang. Amen…
“Silehonlehon Ni Jahowa Do Hamoraon !”
(Parjamita 5 : 9 – 11)
I. Patujolo
Hamoraon ima arta manang sinamot na gabe hak milik ni sasahalak. Godang do halak ala ni pangonjar ni haporluon dohot nahinirim, gabe holan arta manang sinamot (hepeng) nama dipingkiri; beha do asa godang artana; manang aha pe diula, manang aha pe dipingkiri holan hamoraon (arta, sinamot) do di roha nang pingkiran ni jolma i.
Hape Apostel Paulus mandok, “Ai urat nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina” (I Tim.6: 10). Jala Parjamita (Hbr: Qohelet) mandok tung so marguna do hamoraon jala na holong roha di hamoraon (arta, sinamot), ai ndang tagamon gabe parsaulionna i molo gabe dipardebatahon do.
II. Hatorangan
Ringkot do arta, sinamot di ngolunta di hasiangan on. I do tutu ! hombar tu falsafah di hita halak Batak, ima Hasangapon, Hagabeon, dohot Hamoraon. Sada tujuan hidup do hape hamoraon i, ima asa mamora ngoluna. Jala tangkas do dipandohan umpama Batak na mandok, “Tumbur ni pangkat ma tu tumbur ni hotang, manang tudia pe hamu mangalangka, si tusi hamu dapotan”. Unok ni pandohan i asa gabe dapotan hepeng, nampuna hepeng na godang, si jama hepeng; mararta, mamora ngoluna manang tudia pe mangalangka.
Tung pe tujuan ni jolma i asa mamora, alai ndang gabe tunduk jolma i tu hamoraonna i. Ai arta, sinamot na adong di hita boi do gabe hatoban na burju, alai boi do i gabe induk na jahat (pat.Jes 10:15). Lapatanna, arta, sinamot na adong i gabe ulaulanta do i. Jala sipangkeon do nasa ulaula; saguru di namamangke do ulaula na pinangkena, ima hamoraonta i.
Molo gabe roha hepeng (na holongan di arta, sinamot) jolma i, ima urat nasa hajahaton / dosa. Gabe mardebatahon arta ngoluna, gabe hatoban di sinamot ibana. Manang aha pe siulaon, ulahononna do i asal ma dapotan hepeng, tamba artana. Manangko, korupsi, mangemur, marmihimmihim dohot martahitahi na roa pe rade ibana mangulahon holan asal ma tamba arta, sinamotna (hamoraonna).
Hape ndang gabe parsaulian i di jolma na mora na so sian dalan na sintong, na so patut gabe pangomoanna arta, sinamotna i. Ai hamoraon i sian Tuhan Jahowa, Pardengganbasa na sumurung i. Nunga diaturhon TUHAN haroroan arta, sinamot marhite Basabasa-Na i tu ganup hita jolma hombar tu lomo ni roha-Na. Jala tung pe godang arta, sinamot ni sasahalak; tongtong ndang adong boi di parsaulihon jolma i, ala tongtong godang halak na mamparsaulihon (manganhon, mamangke) hamoraonna i. Jala ndang tarpasuda manang olo pasudahon halak na mora i molo dung mamora ibana, baliksa holan manambai artana, sinamotna i do di roha nang pingkiranna, gabe holan paidaida hamoraonna do ibana disi.
Hamoraon, ima arta, sinamot na gabe hak milik sasahalak. Ndada salah manang mardosa halak molo mararta manang godang sinamotna. Alai gabe salah jala mardosa huhut marisuang sambing do i molo dipardebatahon. Molo ndang marbisuk halak mangalului jala mamangke hamoraonna i, gabe i do na mangalonongkon jolma i tu bagasan jea dohot hamagoan. Sahat tu parmodomna pe gabe terganggu, ndang boi renge (sonang) laho modom, alai gabe balisaon do anggo mata ni halak na mora ala holan tu arta, sinamotna i do roha nang pingkiranna.
III. Panimpuli
Parjamita mandok na laho salpu do luhutna jala pangeahion di alogo sambing do na mangeahi hamoraon. Alani i, unang adong na manengahon hamoraonna (pat. Jer 9:22-23), siala ndang tarbahen jolma i manambai manang mangorui arta, sinamot di ngoluna, ai silehonlehon ni Jahowa sambing do i.
Na hinalomohon ni Jahowa sian halak na mora, molo diparhatopot rohana do ianggo hamoraonna i saluhutna marharoroan sian Hamoraon-Na na sian Banua Ginjang. Mamora pe hita siala hamoraon ni Tuhanta do i na mangalehon Basabasa-Na ala asi dohot holong ni rohan-Na mida hita. Molo na mamora pe hita, tongtong tapangke ma hamoraonta i laho mamuji pasangaphon Goar ni Tuhanta Jesus. Ai Tuhanta Jesus Kristus, na mamora hian, gabe pogos ala ni hita, asa gabe mamora hita hinorhon ni pogos-Na i (pat. 2 Kor. 8: 9).
Sude na mandok dirina angka na porsea di Goar ni Tuhanta Jesus, na mamora do ibana di adopan ni Tuhan i. Hamoraonta ndada holan di arta, sinamot na godang, ai molo i na laho salpu, na olo buruk do anggo i. Alai hamoraonta ima, di na satia jala tunduk, mangoloi huhut mangulahon lomo ni roha-Na, tontu jaloonta ma angka basabasa-Na di pardalanan ni ngolunta di hasiangan on,
Ai ndang adong taboan tu hasiangan on, jala ndang tarbahen mamboan agia aha laho ruar. Ai molo adong di hita sipanganon dohot parabiton (arta, sinamot = hamoraon), tahasabamhon ma i jala tama ma tapasahat mauliate ni rohanta tu Tuhanta Jesus laho marsaulihonsa; asa unang gabe so marguna, marisuang hamoraonta i, ima silehonlehon-Na di ngolunta on. Amen !
Posted in khotbah, renungan
Tags: Jamita, khotbah, sermon
Recent Comments